શ્રીલંકાના પ્રવાસે જવા સામે અમેરિકાની નાગરિકોને ચેતવણી

અમેરિકાએ પોતાના નાગરિકોને શ્રીલંકાના પ્રવાસે જવા સામે ચેતવણી આપી હતી. શ્રીલંકામાં ઇસ્ટર રવિવારે થયેલા 8 ધડાકા અને હજી વધુ ત્રાસવાદી હુમલા થવાની સંભાવનાને ધ્યાનમાં રાખીને આ ચેતવણી અપાઇ હતી.

શ્રીલંકામાં ગયા રવિવારે 3 ચર્ચ, 3 પંચતારક હૉટેલ, એક પ્રાણીબાગ પાસે અને એક ઇમારતમાં થયેલા કુલ 8 ધડાકામાં ઓછામાં ઓછા 359 લોકો માર્યા ગયા હતા અને પાંચસોથી વધુ લોકો ઘાયલ થયા હતા. અમેરિકાના વિદેશ મંત્રાલયે શ્રીલંકાના પ્રવાસના જોખમનું સ્તર શુક્રવારે વધારીને ‘ત્રીજા સ્તર’નું કર્યું હતું. આ ઉપરાંત, શ્રીલંકામાં રહેતા જે અમેરિકાના સરકારી કર્મચારીઓના બાળકો શાળામાં જતાં હોય તેઓને સ્વદેશ જવાની સલાહ અપાઇ હતી.

અમેરિકાના વિદેશ મંત્રાલયે પોતાના નિવેદનમાં જણાવ્યું હતું કે ત્રાસવાદી સંગઠનો શ્રીલંકામાં ફરી હુમલા કરે એવી શક્યતા છે. તેણે જણાવ્યું હતું કે શ્રીલંકામાં પરિવહન કેન્દ્રો, બજારો, શૉપિંગ મોલ્સ, સરકારી કચેરીઓ, હૉટેલ્સ, ક્લબ્સ, રેસ્ટૉરાં, ધાર્મિક સ્થળો, બગીચા, મોટા સ્પૉટર્સ અને સાંસ્કૃતિક કાર્યક્રમો, શૈક્ષણિક સંસ્થાઓ, વિમાનમથકો, હૉસ્પિટલો અને અન્ય જાહેર સ્થળે ત્રાસવાદી હુમલા થઇ શકે છે. તેણે જણાવ્યું હતું કે શ્રીલંકામાંની સલામતીને લગતી હાલની પરિસ્થિતિને કારણે અમેરિકી નાગરિકોને તાકીદની સેવા પૂરી પાડવાની અમેરિકી સરકારની ક્ષમતા મર્યાદિત છે.