ચેમ્બર ઓફ કોમર્સ અને ઘાના ઈન્ડિયા ચેમ્બર ઓફ કોમર્સ એન્ડ ઈન્ડસ્ટ્રી વચ્ચે MOU સાઈન કરાયા

ચેમ્બર ઓફ કોમર્સ અને ઘાના ઈન્ડિયા ચેમ્બર ઓફ કોમર્સ એન્ડ ઈન્ડસ્ટ્રી વચ્ચે MOU સાઈન કરાયા

ઘાનામાં ટેક્ષ્ટાઈલ, ફાર્મા, ઈલેક્ટ્રીક અને સોલાર ક્ષેત્રે ઉદ્યોગની તકો રહેલી છે

સુરતઃ ધી સધર્ન ગુજરાત ચેમ્બર ઓફ કોમર્સ એન્ડ ઈન્ડસ્ટ્રી અને ઘાના ઈન્ડિયા ચેમ્બર ઓફ કોમર્સ એન્ડ ઈન્ડસ્ટ્રી વચ્ચે શુક્રવાર, તા. ૨૬ જૂન ૨૦૨૬ ના રોજ Memorandum Of Understanding (MOU) સાઈન કરાયા. આ MOUનો મુખ્ય હેતુ ભારત અને ઘાના વચ્ચે વેપાર, ઉદ્યોગ, રોકાણ અને દ્વિપક્ષીય વ્યાપારને વધુ મજબૂત બનાવવાનો છે. આ ભાગીદારી દ્વારા બંને દેશોના ઉદ્યોગકારો અને વેપારીઓ માટે નવાં બિઝનેસના અવસરો ઊભાં થશે.

ચેમ્બર ઓફ કોમર્સના પ્રમુખ શ્રી અશોક જીરાવાલાએ જણાવ્યું હતું કે, કોઈપણ દેશ સાથે વેપાર કરતા પહેલા આપણે એમની સરકારની યોજનાઓ તેમજ સરકારના ઉદ્યોગના પ્રોત્સાહન માટેની નીતિઓ અંગેની માહિતી મેળવવી જોઈએ. શરૂઆતમાં દક્ષિણ ગુજરાતના ઉદ્યોગકારો દ્વારા ઘાના સાથો નાના પાયે વેપાર કરવામાં આવશે. સમયાંતરે વેપારમાં વધારો કરવામાં આવશે. ઘાના સાથે વેપાર કરતી વખતે ચેમ્બર ઓફ કોમર્સને સાથે રાખીને વેપાર કરવો હિતાવહ રહેશે.

ઘાના ઈન્ડિયા ચેમ્બર ઓફ કોમર્સ એન્ડ ઈન્ડસ્ટ્રીના એક્ઝિક્યુટીવ ડિરેક્ટર મિ. સ્ટીફન ક્વાકુ દારકુએ જણાવ્યું હતું કે, સુરત તેમજ દક્ષિણ ગુજરાતના ઉદ્યોગ સાહસિકો પાસે ઘાના સાથે વેપાર કરવાની ઉત્તમ તક છે. ઘાના એક ફ્રી ટ્રેડ પોલિસી ધરાવતો દેશ છે. તેથી અહીં બિઝનેસ કરવું સરળ બને છે. ઘાનામાં ટેક્ષ્ટાઈલ, ફાર્મા, ઈલેક્ટ્રીક અને સોલાર ક્ષેત્રે ઉદ્યોગની તકો રહેલી છે. ઘાના ચેમ્બર ઓફ કોમર્સ ઉદ્યોગકારોને ઉદ્યોગ કરવા અથવા ઉદ્યોગ સ્થાપિત કરવા શક્ય હોય એટલો સહકાર આપશે.

ચેમ્બરના માનદ્ સેક્રેટરી શ્રી પરેશ લાઠિયાએ ઉપસ્થિત સર્વેનો આભાર માન્યો હતો. આ પ્રસંગે ઘાના ઈન્ડિયા ચેમ્બર ઓફ કોમર્સ એન્ડ ઈન્ડસ્ટ્રીના ચેરમેન મિ. ડેવિડ બ્રિયાન ઓબ્રો, એક્ઝિક્યુટીવ ડિરેક્ટર સ્ટીફન ક્વાકુ દારકુ અને સભ્ય સોલોમોન વિયાફ તેમજ ચેમ્બર ઓફ કોમર્સના માનદ્ ખજાનચી શ્રી અતુલ પટેલ ઉપસ્થિત રહયા હતા.