RCB બબ્બે સદીઓની સુનામીમાં તણાય ગયું, કોહલીની ત્રીજા હાર

સનરાઇઝર્સ હૈદરાબાદનો કોહલીસેના સામે 118 રને ઝમકદાર વિજય
હૈદરાબાદ: 20 ઓવર 2/ 231 બેંગ્લોર: 19.5 ઓવર 113 બેયરસ્ટો (114) અને વોર્નર (100*) વચ્ચે પહેલી વિકેટમાં
185 રનની વિક્રમી ભાગીદારી: નબીની 11 રનમાં 4 વિકેટ
હૈદરાબાદ તા.31: પ્લેયર ઓફ ધ મેચ જોની બેયરસ્ટો અને ડેવિડ વોર્નરના રન સૈલાબમાં આરબીસીની કોહલીસેના તણાઇ ગઇ હતી. બેયરસ્ટો (114) અને વોર્નર (અણનમ 100)ની સદીથી સનરાઇઝર્સ હૈદરાબાદે આઇપીએલના આજના પહેલા મેચમાં 20 ઓવરમાં માત્ર બે વિકેટ ગુમાવીને 231 રનનો જંગી જુમલો ખડકયો હતો. જવાબમાં રોયલ ચેલેન્જર્સ બેંગ્લોરની ટીમ હૈદરાબાદની બોલિંગ સામે ઘૂંટણિયે પડીને ટીમ 19.3 ઓવરમાં 113 રનમાં જ ડૂલ થઇ ગઇ હતી. આથી સનરાઇઝર્સનો 118 રને ઝમકદાર વિજય નોંધાયો હતો. સતત ત્રીજી હારથી સિતારા ખેલાડીઓથી સજજ આરસીબીની ટીમ પોઇન્ટ ટેબલ પર તળિયે ધકેલાઇ ગઇ છે. જયારે સનરાઇઝર્સ ટોચ પર પહોંચી છે.
232 રનના પહાડ જેવા વિજય લક્ષ્યાંક સામે આરસીબીના તમામ ટોચના બેટધરો હૈદરાબાદની સ્પિન અને પેસ જોડી નબી અને શર્મા સામે પાર્થિવ (11), હેટમાયર (9), સુકાની કોહલી (3), ડિ’વિલિયર્સ (1), મોઇન અલી (2) નિષ્ફળ રહયા હતા. સૌથી વધુ 37 રન ગ્રેંડહોમે કર્યાં હતા. નવોદિત પ્રયાસ બર્મને 19 રન બનાવ્યા હતા. અફઘાન સ્પિનર મોહમ્મદ નબીએ ચાર ઓવરમાં માત્ર 11 રન આપીને 4 વિકેટ લીધી હતી. જયારે સંદિપ શર્માને 19 રનમાં 3 વિકેટ મળી હતી. આરસીબીએ 3પ રનમાં 6 વિકેટ ગુમાવી દીધી હતી.
આ પહેલા આરસીબીના સુકાની વિરાટ કોહલીએ ટોસ જીતીને સનરાઇઝર્સ હૈદરાબાદને દાવ આપવાની ભુલ કરી હતી. સનરાઇઝર્સના ઇન ફોર્મ બન્ને ઓપનર ઇંગ્લેન્ડના જોની બેયરસ્ટો અને ઓસ્ટ્રેલિયાના પ્રતિબંધમાંથી વાપસી કરનાર ડેવિડ વોર્નરે બેંગ્લોરના બોલરોનો કચ્ચરઘાણ કાઢીને ધસમસતી સદી ફટકારી હતી. બેયરસ્ટો-વોર્નરના રન સૈલાબમાં આરસીબીના તમામ બોલરો તણાઇ ગયા હતા. આથી સનરાઇઝર્સ હૈદરાબાદે તેનો આઇપીએલનો સૌથી મોટી સ્કોર બે વિકેટે 231 રન ખડકયો હતો.

બેયરસ્ટોએ તેની આઇપીએલ કેરિયરની પહેલી સદી ફટકારી હતી. તેણે માત્ર પ6 દડામાં 12 ચોકકા અને 7 છકકાથી આતશી 114 રનની ઇનિંગ રમી હતી. તો ઇન ફોર્મ કાંગારૂ ફટકાબાજ ડેવિડ વોર્નર પપ દડામાં પ ચોકકા અને પ છકકાથી 100 રને અણનમ રહયો હતો. બેયરસ્ટો અને વોર્નર વચ્ચે પહેલી વિકેટમાં 98 દડામાં 18પ રનની આક્રમક અને વિક્રમી ભાગીદારી થઇ હતી.

વોર્નર અને બેયરસ્ટોની ફટકાબાજીથી કોહલીસેનાની બોલિંગ-ફિલ્ડીંગ છિન્નભિન્ન થઇ હતી. આરસીબીને એકમાત્ર સફળતા ચહલને મળી હતી. તેણે બેયરસ્ટોને 114 રને ઉમેશના હાથે કેચઆઉટ કરાવ્યો હતો. વિજય શંકર 9 રને રનઆઉટ થયો હતો. પઠાણ 6 રને નોટઆઉટ રહયો હતો.