મોદીએ ૧૫ લાખ ના આપ્યા પણ અમે પાંચ વર્ષમાં ૩.૬૦ લાખ આપીશું: રાહુલ ગાંધી

ગુજરાતમાં લોકસભાની ચૂંટણીના બીજા તબક્કાના ચૂંટણી પ્રચાર માટે આવેલા કોંગ્રેસના રાષ્ટ્રીય અધ્યક્ષ રાહુલ ગાંધીએ આજે જૂનાગઢ અને કચ્છ એમ બે સ્થળોએ ચૂંટણી સભાઓ સંબોધતા કહ્યું હતું કે, નરેન્દ્ર મોદીએ ૧૫ લાખ લોકોના બેન્ક એકાઉન્ટમાં જમા કરાવાનું જુઠ્ઠુ વચન આપ્યું હતું પણ અમે ગેરન્ટી સાથે વચન આપીએ છીએ કે, અમારી સરકાર આવશે તો દેશની પાંચ કરોડ મહિલાઓના બેન્ક ખાતાઓમાં વર્ષે રૂ. ૭૨ હજાર જમા કરાવીશું આમ પાંચ વર્ષમાં રૂ. ૩.૬૦ લાખ જમા કરાવીશું, આ પગલાંથી અર્થતંત્રને કોઇ જ નુકશાન થવાનું નથી પરંતુ વધારે મજબૂતિ મળશે.

વંથલી ખાતે ચૂંટણી સભાને સંબોધતા રાહુલ ગાંધીએ ભાજપ અને નરેન્દ્ર મોદી પર શાબ્દિક પ્રહાર કરતા કહ્યું હતું કે, મોદી બે હન્દિુસ્તાન બનાવે છે એક નિરવ મોદી, માલ્યાવાળુ અને બીજું ગબ્બરસિંહ ટેક્સવાળું. ચોક્કસ લોકોના દેવા માફ થાય છે તો ખેડૂતોના કેમ નહીં. કોંગ્રેસની સરકાર બનાવો ૧૦ દિવસમાં દેવું માફ. દેશના ખેડૂતોનું મોદી દેવું માફ કરતા નથી.

ગરીબી પર કોંગ્રેસની સર્જિકલ સ્ટ્રાઇક, વર્ષે ૭૨ હજાર આપીશું. ન્યાયની સરકાર બનાવવી છે કે અનિલ અંબાણીની સરકાર? નરેન્દ્ર મોદીએ પહેલીવાર રોજગારી નષ્ટ કરી દીધી છે.

મોદીએ નોટબંધી વખતે માતા, બહેનોને બેંકની લાઇનમાં ઊભા રાખી દીધાં. બેંકના ચોર કેમ બેંકની લાઇનમાં ન દેખાયા. અમે ગરીબના ખાતામાં દર વર્ષે ૭૨ હજાર નાંખીશું. નરેન્દ્ર મોદીએ ૧૫ લાખનું જુઠું બોલ્યા હતા પરંતુ અમે ૩ લાખ ૬૦ હજાર આપીશું. ચોકીદારે માતા, બહેનો અને ખેડૂતો પાસેથી જ ચોરી કરી છે.

તમને મિત્રો કહે છે. અંબાણી અને નિરવને ભાઇ કહે છે એટલે ફાયદો બધો ભાઇઓને મળે છે. ખેડૂતો પાસેથી રૂ. ૧૦ હજાર કરોડનું વીમા પ્રીમીયમ અમીરોના ખાતામાં જમા થાય છે. દેવું ન ભરી શકનાર કોઇ પણ ખેડૂતને અમે જેલ નહીં જવા દઇએ.