મુંબઇમાં સાર્વજનિક ગણેશમંડળોને ઑનલાઇન મંજૂરી આપવાનું શરૂ

શહેરમાં ગણેશોત્સવ અને નવરાત્રી દરમિયાન મંડપ બાંધવા માટે બૃહન્મુંબઈ મહાનગરપાલિકાની મંજૂરી લેવી આવશ્યક હોય છે તેમ જ આ અંંગેની અરજી કરતી વખતે તેની સાથે મુંબઈ પોલીસ અને ટ્રાફિક પોલીસનું નોઓબ્જેકશન સર્ટિફિકેટ (એનઓસી) પણ આવશ્યક હોય છે. આ પ્રક્રિયામાં ઘણો સમય વેડફાતો હોવાથી હવે પાલિકાએ મુંબઈ પોલીસના સહકારથી આ મંજૂરી પ્રક્રિયા મરાઠી અને અંગ્રેજી આ બંને ભાષામાં ઑનલાઇન કરવામાં આવી છે.

ગણેશોત્સવ અને નવરાત્રીમાં સાર્વજનિક મંડપ ઊભા કરવા માટે પાલિકાની મંજૂરી આવશ્યક છે. આ અંગેની મંજૂરી લેવા માટે સંબંધિત મંડળને પાલિકાના કાર્યલયમાં જાતે જઇને અરજી આપવી પડી છે. તેમ જ આ અરજી રજૂ કરતી વખતે તેની સાથે મુંબઈ પોલીસ અને ટ્રાફિક પોલીસની એનઓસી પણ આપવી પડે છે. તે માટે સ્થાનિક પોલીસ સ્ટેશન અને ટ્રાફિક પોલીસની ઑફિસના ધક્કા ખાવા પડે છે. નાગરિકોની સુવિધા માટે ‘ઇઝ ઑફ ડુઇંગ’ અંતર્ગત પાલિકાએ ઓનલાઇન સેવા ઉપલબ્ધ કરાવી છે. ઓનલાઇન અરજી કરવા માટે સૌપ્રથમ પાલિકાની વેબસાઇટ www.mcgm.gov.in પર જવાનું રહેશે. વેબસાઇટના હોમ પેજ પર ‘ઓનલાઇન સેવા’ આ વિકલ્પ પર માઉસ પોઇન્ટર મૂકતા ‘ડ્રોપ ડાઉન મેનુ’ દેખાશે. તેમાં 14માં નંબર પર ‘પરીક્ષણ’ (મેન્ટેનન્સ) આ લિન્ક છે. આ લિન્ક પર ‘માઉસ પોઇન્ટર’ મૂકતા પાંચમાં નંબર પર ‘ગણપતિ/નવરાત્રી’ની લિન્ક દેખાશે. આ લિન્ક પર ક્લિક કરવા પર એક વેબપેજ ખૂલશે, તેના પર ઓનલાઇન અરજી કરવાનો વિકલ્પ ઉપલબ્ધ છે, એવું પાલિકાએ અખબારી યાદીમાં જણાવ્યું હતું.