CIA ALERT

જોરદાર રસાકસીનો શમીની હૅટ-ટ્રિક સાથે અંત

Share On :

ભારત શનિવારે અહીં અફઘાનિસ્તાનને વર્લ્ડ કપની અત્યંત રસાકસીભરી મૅચની છેલ્લી ઓવરના પાંચમા બૉલમાં ૧૧ રનના માર્જિનથી હરાવીને સેમી ફાઇનલની લગોલગ પહોંચી ગયું હતું. અફઘાનિસ્તાનના મોહંમદ નબી (બાવન રન, ૧૦૫ મિનિટ, પંચાવન બૉલ, એક સિક્સર, ચાર ફોર)એ ભારતીયોના નાકે દમ લાવી દીધો હતો, પરંતુ મોહંમદ શમીએ આ વખતના વર્લ્ડ કપમાં પ્રથમ હૅટ-ટ્રિક લેનાર બોલર તરીકેનું નામ નોંધાવ્યું હતું. તેને ઈજાગ્રસ્ત ભુવનેશ્ર્વરના સ્થાને રમવાનો મોકો મળ્યો હતો અને તેણે એનો પૂરો ફાયદો લીધો હતો.

અફઘાનની ટીમ ૨૨૫ રનના લક્ષ્યાંક સામે ૪૯.૫ ઓવરમાં ૨૧૩ રનના સ્કોર સાથે ઑલઆઉટ થઈ હતી. ભારત મૅચ જીત્યું, પણ અફઘાનિસ્તાનના ખેલાડીઓએ બધાના દિલ જીતી લીધા હતા. વર્લ્ડ કપના ઇતિહાસમાં ભારતનો આ ૫૦મો વિજય હતો.

બુમરાહે ખરા સમયે બે વિકેટ (રહમત શાહ-૩૬ રન અને હશમતુલ્લા શાહિદી-૨૧ રન) લીધી હતી અને તેને મૅન ઑફ ધ મૅચનો અવૉર્ડ અપાયો હતો. બુમરાહે એક પછી એક યૉર્કર ફેંકીને અફઘાનના બૅટ્સમેનોને મુસીબતમાં મૂકી દીધા હતા. શમીએ હૅટ-ટ્રિક લેવાની શરૂઆત સૌથી ડેન્જરસ બૅટ્સમૅન મોહંમદ નબીથી કરી હતી અને પછીના બે બૉલમાં આફતાબ અને મુજીબને ક્લીન બોલ્ડ કર્યા હતા. શમી વન-ડેના વર્લ્ડ કપમાં હૅટ-ટ્રિક લેનાર ચેતન શર્મા પછીનો બીજો ભારતીય છે.

વન-ડેના વર્લ્ડ કપમાં મોહંમદ શમીની હૅટ-ટ્રિક ૧૦મો કિસ્સો હતો. આગલા નવ કિસ્સા આ મુજબના હતા: ચેતન શર્મા (૧૯૮૭ વર્લ્ડ કપ), સક્લેન મુશ્તાક (૧૯૯૯), ચામિન્ડા વાસ (૨૦૦૩), બ્રેટ લી (૨૦૦૩), લસિથ મલિન્ગા (૨૦૦૭) (૪ બૉલમાં ૪ વિકેટ), કીમાર રૉચ (૨૦૧૧), લસિથ મલિન્ગા (૨૦૧૧), સ્ટીવન ફિન (૨૦૧૫), જેપી ડુમિની (૨૦૧૫).

શનિવારે કેદાર જાધવ અને વિજય શંકરને બોલિંગ જ નહોતી આપવામાં આવી.

એક તબક્કે શમી બે વાર કમનસીબ સાબિત થયો હતો. તેના બૉલમાં બૅટ્સમૅન સામે એલબીડબ્લ્યૂની જોરદાર અપીલ થઈ હતી અને બૅટસમૅન આઉટ પણ હતો, પરંતુ ‘પિચિંગ આઉટસાઇડ’ને કારણે થર્ડ અમ્પાયરે નૉટઆઉટ જાહેર કર્યો હતો. શમીની બોલિંગમાં આવું બે વખત બન્યું હતું અને નસીબદાર અફઘાની બૅટ્સમેન બચી ગયા હતા. એકંદરે ભારતની ફીલ્ડિંગ શનિવારે સારી નહોતી.

એ પહેલાં, ભારતે ટૉસ જીતીને બૅટિંગ લીધી હતી અને નબળી શરૂઆત કરી હતી. રોહિત શર્મા પાંચમી ઓવરમાં ૭ રનના ટીમ-સ્કોર પર આઉટ થઈ ગયો હતો. તે ૧૦ બૉલમાં એક રન બનાવી શક્યો હતો. સાથી-ઓપનર લોકેશ રાહુલ પણ લાંબો સમય ક્રીઝ પર નહોતો ટક્યો. અફઘાનિસ્તાન જેવી વર્લ્ડ કપની નવીસવી ટીમ સામે ભારતીય ટીમમાં ફક્ત બે હાફ સેન્ચુરી થઈ હતી. વિરાટે ૬૭ રન અને કેદાર જાધવે ૮૮ મિનિટ સુધી ક્રીઝ પર રહીને બાવન રન બનાવ્યા હતા.

Share On :

આપના કે આપની સંસ્થાના કોઇપણ પ્રકારના સમાચાર, ઇવેન્ટ કવરેજ, ઇન્વિટેશન, બ્લોગ રાઇટિંગ વગેેરે માટે સંપર્ક કરો : 98253 44944
For any News, Event coverage, Reporting, Invitations etc, Please Feel Free to contact on : 98253 44944
आपके किसी भी प्रकार के न्युज, इवेन्ट कवरेज, इन्विटेशन्स आदि के लिए कृपया संपर्क करें : 98253 44944


You Can Find us on Google Play store too : Download Now

Leave a Reply

Your email address will not be published. Required fields are marked *

Share On :
Print Friendly, PDF & Email

Share On :