ગુજરાતમાં ચૂંટણી લડી રહેલા 371 ઉમેદવારોનું ભાવિ નક્કી કરી રહ્યા છે 4.51 કરોડ મતદારો

મહારાષ્ટ્રની 14 અને ગુજરાતની 26 બેઠકો સાથે 23મી એપ્રિલે દેશની કુલ 115 બેઠકો માટે લોકસભાની ચૂંટણીના ત્રીજા તબક્કાનું મતદાન

ગુજરાતની લોકસભાની 26 બેઠકોના ભાવિ આજે તા.23 એપ્રિલ 2019ને મંગળવારે સવારે 7 વાગ્યાથી મતદાન શરૂ થઇ ચૂક્યું છે.

ગુજરાતના 4.51 કરોડ મતદાતાઓ 26 બેઠકો પર ચૂંટણી લડી રહેલા 371 ઉમેદવારોનું ભાવિ નક્કી કરી રહ્યા છે.

રાજ્યમાં શાંતિપૂર્ણ રીતે મતદાન થાય તે માટે ચૂંટણી પંચ દ્વારા તમામ વ્યવસ્થાઓ કરવામાં આવી છે. મતદાન મથકો પર પેરામિલ્ટ્રી ફોર્સ સહિતના જવાનોને તેનાત રાખવામાં આવ્યા છે.

રાજ્યના કુલ 51 હજાર 851 મતદાન મથકો પર આજે મતદાન સવારે 7ના ટકોરે શરૂ થઇ ચૂક્યું છે. જે માટે શહેરી વિસ્તારમાં 17 હજાર 430 મતદાન મથકો અને ગ્રામ્ય વિસ્તારમાં 34 હજાર 421 મતદાન મથકોની વ્યવસ્થા કરાઇ છે. પરંતુ કાળઝાળ ગરમીના કારણે મતદાન બપોરના 1થી 5 સુધી ઘટવાની શક્યતાઓ છે. જેની સામે સવારથી મતદારોની લાંબી લાઈનો લાગશે. ગુજરાતમાં મંગળવારે ગરમીનો પારો 44 ડિગ્રીને પાર કરી જાય તેવી આગાહી છે ત્યારે રાજકીય પક્ષો અને ઉમેદવારોમાં ઓછા મતદાનનો ભય છે.