ગોંડલમાં દાદીએ જ પૌત્રીને ઝેરી દવા પીવડાવીને કરી હત્યા

ગોંડલમાં હજુ 19 દિવસ પહેલા જન્મેલી બાળા ખૂબ રાડારાડ કરતી હોવાથી તબીબે લખી આપેલી દવામાં બાળકીના દાદીએ ઝેરી દવા ભેળવી દેતા આ ઝેરી દવા બાળકી રડતા માતા-પિતા તેને પીવડાવતા દીકરી શાંત થવાને બદલે વધુ રડવા માંડતા પિતાએ તેને તેડતાં મોઢામાંથી મોનોકોટો દવાની વાસ આવતાં તાત્કાલિક ગોંડલ ખાનગી હૉસ્પિટલમાં અને ત્યાં તબિયતમાં સુધારો ન થતાં વધુ સારવાર માટે રાજકોટ સિવિલના કે. ટી. ચિલ્ડ્રન વિભાગમાં ખસેડવામાં આવી હતી. જ્યાં સારવાર દરમિયાન તેનું મોત થયું હતું. ઘટનાની જાણ પોલીસને થતાં પોલીસે ગુનો નોધી વધુ તપાસ હાથ ધરી હતી. સૂત્રોના જણાવ્યા અનુસાર ગોંડલ શહેરમાં રહેતા કેતનના લગ્ન મૂળ મહારાષ્ટ્રની સંગીતા સાથે સાડા ચાર વર્ષ પહેલા થયા હતા. સંતાનમાં એક ત્રણ વર્ષની દીકરી ત્રિશા હતી અને19 દિવસ પહેલા પત્નીને બીજી દીકરીને જન્મ આપ્યો હતો. તેનું નામ કિંજલ પાડ્યું હતું. કિંજલ કજિયા કરે તો તેને આપવા માટેની દવા ડૉક્ટરે લખી આપી હોય તે ઘરમાં રાખી હતી. આ દવા કિંજલ રડતા આપવામાં આવી હતી. દવા આપ્યા બાદ કિંજલની તબિયત અચાનક ખરાબ થઈ જતા તેને પ્રથમ ગોંડલની ખાનગી હૉસ્પિટલમાં અને ત્યાર બાદ વધુ સારવાર અર્થે રાજકોટની સિવિલ હૉસ્પિટલમાં ખસેડવામાં આવી હતી. જ્યાં તેનું સારવાર દરમિયાન મોત થયું હતું. આ કિંજલને તબીબે આપેલી દવામાં સાસુએ કોઈ ઝેરી પદાર્થ ભેળવ્યો હોવાની શંકાને લઈ આક્ષેપ કરવામાં આવ્યો હતો. ઘટનાને પગલે પોલીસે ગુનો નોધી વધુ તપાસ હાથ ધરી હતી.