મુંબઇમાં રોડ પર બેફામ બાઇક દોડાવતા ૭૦૦ ફૂડ ડિલિવર બાઇકરને દંડ

ટ્રાફિકના નિયમનો ભંગ કરવા બદલ છેલ્લા અઠવાડિયામાં ટુ-વ્હીલર પર ફૂડ ડિલિવરી કરનાર ૭૦૦ બાઇકરને દંડ ફટકારવામાં આવ્યો હતો.  મુંબઇગરાઓએ લગભગ દરેક વિસ્તારમાંથી એવી ફરીયાદો કરી હતી કે જુદી જુદી ફુડ ડિલિવરી કંપનીઓ જેવી કે સ્વીગી, ઝોમેટો, ઉબેર ઇટ્સ, ડોમીનોઝ પીઝા તેમજ અન્ય પ્રાઇવેટ રેસ્ટોરેન્ટસના ડિલીવરી બોયઝ દ્વારા બેફામ રીતે બાઇક હંકારીને અન્ય વાહનચાલકોનો જીવ જોખમમાં મૂકવામાં આવે છે, વનવેમાં બેફામ ગતિઓ બાઇકો દોડાવે છે, હોર્ન વગાડીને પરેશાન કરી રહ્યા છે આવી અનેક ફરીયાદોને પગલે મુંબઇ ટ્રાફિક પોલીસ અને આર.ટી.ઓ. દ્વારા સંયુક્ત રીતે અભિયાન હાથ ધરીને ફૂડ ડિલીવરી બોયઝને જુદા જુદા ગુનાઓમાં દંડ કર્યો હતો.

હેલ્મેટ પહેર્યા વગર બાઇક સવારી કરવી, ફૂટપાથ પર બાઇક ચલાવવી, સિગ્નલ તોડવી, મર્યાદા કરતાં વધુ ઝડપે બાઈક હંકારવી વગેરે કારણોસર તેમના વિરુદ્ધ કાર્યવાહી કરવામાં આવી હતી. તેમ જ વારંવાર ટ્રાફિકના નિયમનો ભંગ કરનાર ગુનેગારની યાદી રિજનલ ટ્રાન્સપોર્ટ ઑફિસ (આરટીઓ)ને મોકલીને તેમનું લાઇસન્સ રદ કરવાનું ટ્રાફિક પોલીસે જણાવ્યું છે.

એટલું જ નહીં, આવા ડિલિવરી બૉયને નોકરીમાંથી કાઢી નાખવા માટે પણ ઍપ આધારિત ફૂડ ડિલિવરી કંપનીઓને જણાવવામાં આવ્યું છે.