હોમ લોન ધારકોનો EMI મોંઘો થશે

નિષ્ણાંતો કહે છે કે વ્યાજદરની સાઇકલ બદલાઈ છે અને વ્યાજદરમાં ઘટાડાનો કોઈ પ્રશ્ન નથી. રિટેલ લોનધારકોના EMIમાં ઊંચા રહેવાનો કે તેમાં વધુ વદ્ધિનો અંદાજ છે. પ્રોત્સાહક આર્થિક વૃદ્ધિ અને ક્રૂડના ઊંચા ભાવને કારણે ફુગાવા અંગેની ચિંતાથી વ્યાજદર ઊંચા સ્તરે રહેવાની શક્યતા છે. વિશ્લેષકોના મતે રૂપિયાના મૂલ્યમાં ઘટાડાને કારણે RBIને વ્યાજદરમાં ઝડપી વૃદ્ધિની ફરજ પડશે.

વ્યાજદરમાં વૃદ્ધિ રિટેલ લોનધારકો માટે આકરી પુરવાર થવાની શક્યતા છે. ચાલુ નાણાકીય વર્ષના બાકીના ભાગમાં લોનની EMI ઊંચી રહેશે અથવા તેમાં વધુ વૃદ્ધિનો અંદાજ છે. ચાલુ મહિને SBI, HDFC બેન્ક, ICICI બેન્ક, ‌‌BoB અને યુનિયન બેન્કે બેન્ચમાર્ક MCLRમાં 0.05થી 0.2 ટકા સુધીનો વધારો કર્યો છે. HDFC બેન્ક અને SBIએ MCLR 0.2 ટકા વધાર્યા છે. SBIનો એક વર્ષની મુદતનો MCLR (માર્જિનલ કોસ્ટ બેઝ્ડ લેન્ડિંગ રેટ) 8.25 ટકાથી વધીને 8.45 ટકા થયો છે. ચાલુ વર્ષે માર્ચ મહિનામાં 7.95 ટકાના નીચા સ્તરથી 0.5 ટકા વધ્યો છે.

વ્યાજદર વધશે તો લોનધારકોએ દર મહિને લોન અને મોર્ગેજ માટે ઊંચો હપતો (EMI) ચૂકવવો પડશે. જેમ કે, માર્ચ મહિનાથી SBIએ વ્યાજદરમાં 0.5 ટકા વધારો કર્યો છે. તેને લીધે હોમ લોનધારકોએ 10 વર્ષની મુદતની ₹50 લાખની લોન પર મહિને ₹1,500 અથવા વર્ષે ₹18,000 વધુ ચૂકવવા પડશે. બેન્કર્સના જણાવ્યા અનુસાર અત્યારે તો વ્યાજદર ઊંચા રહેવાની ધારણા છે.

RBI ગવર્નર રિટેલ ફુગાવા (CPI)ને 4 ટકાની આસપાસ રાખવા કટિબદ્ધ છે. થોડા સમય પહેલાં જાહેર થયેલા આંકડા મુજબ ઓગસ્ટમાં CPI ઘટીને 3.69 ટકા રહ્યો છે, જે રિઝર્વ બેન્કના ટાર્ગેટ કરતાં નીચે છે. જોકે, ચાલુ ખાતાની ખાધમાં વૃદ્ધિને કારણે મની માર્કેટ્સ દબાણમાં રહ્યા છે અને તેને લીધે રૂપિયો અત્યાર સુધીની નીચી સપાટીને સ્પર્શ્યો હતો.

બેન્કર્સના જણાવ્યા અનુસાર મની માર્કેટમાં તરલતાની સ્થિતિ તંગ બની છે. તેને લીધે 10 વર્ષની મુદતના બેન્ચમાર્ક બોન્ડની યીલ્ડ એક ટકા વધીને 8.12 ટકા થઈ છે, જે એપ્રિલમાં 7.12 ટકા હતી. બીજા શબ્દોમાં કહીએ તો વ્યાજદરમાં ટૂંકા ગાળામાં ઘટાડાની શક્યતા નહીંવત્ છે.