આજે (10/7) COPA America ફાઇનલમાં મેસ્સી વિ. નેમારનો મુકાબલો

ફીફા વર્લ્ડ કપ અને યુરો કપ બાદની સૌથી વધુ લોકપ્રિય અને પ્રતિષ્ઠીત કોપા અમેરિકા કપ ફૂટબોલ ટૂર્નામેન્ટના ફાઇનલમાં ગત ચેમ્પિયન બ્રાઝિલ સામે મજબૂત આર્જેન્ટિનાની ટક્કર થશે. ત્યારે વિશ્વના સ્ટાર સ્ટ્રાઇક લિયોનસ મેસ્સીનું લક્ષ્ય તેના સુકાનીપદ હેઠળ આર્જેન્ટિનાને પહેલીવાર કોઇ મોટી ટૂર્નામેન્ટમાં ચેમ્પિયન બનાવવાનું રહેશે. આર્જેન્ટિનાની ટીમે 1993 બાદથી કોઇ મોટો ખિતાબ જીત્યો નથી.

મેસ્સી 2007, 2015 અને 2016ની કોપા અમેરિકા કપ હારનાર આર્જેન્ટિનાની ટીમનો હિસ્સો રહ્યો છે. જ્યારે 2014ના વર્લ્ડ કપના ફાઇનલમાં તેને જર્મની સામે હાર સહન કરવી પડી હતી. આર્જેન્ટિનાએ સેમિ ફાઇનલમાં પેનલ્ટી શૂટઆઉટમાં કોલંબિયાને હાર આપીને ફાઇનલમાં જગ્યા બનાવી હતી.

બીજી તરફ નેમાર એન્ડ કું. ખિતાબ બચાવવા મેદાને પડશે. બ્રાઝિલ ગત ચેમ્પિયન છે અને આ વખતે પણ ટ્રોફીનું પ્રબળ દાવેદાર છે. બ્રાઝિલે સેમિ ફાઇનલમાં પેરૂને 1-0 ગોલથી હાર આપીને ફાઇનલમાં પ્રવેશ કર્યોં હતો. આર્જેન્ટિના અને બ્રાઝિલ વચ્ચેનો ફાઇનલ મુકાબલો ભારતીય સમય અનુસાર રવિવારે સવારે પ-30 વાગ્યાથી શરૂ થશે.