સોનિયા પછી રાહુલ ગાંધી પણ વડાપ્રધાન પદ છોડવા તૈયાર?

લોકસભા ચૂંટણીનાં આખરી તબક્કાનાં મતદાન પૂર્વે વિપક્ષી દળોએ ગઠબંધનનાં પ્રયાસો હાથ ધરી દીધા છે. જેમાં યુપીએનાં અધ્યક્ષા સોનિયા ગાંધીએ ચૂંટણી પરિણામનાં દિવસે જ એટલે કે 23મી મેનાં રોજ વિપક્ષી નેતાઓની એક મહત્વપૂર્ણ બેઠક પણ બોલાવી છે.

બીજીબાજુ કોંગ્રેસનાં વરિષ્ઠ નેતા ગુલામ નબી આઝાદે કેન્દ્રમાં ભાજપની આગેવાનીવાળા એનડીએ મોરચાની સરકાર રચાતી અટકાવવા માટે કોંગ્રેસ વડાપ્રધાન પદ ન મળે તો પણ યુતિમાં જોડાવા તૈયાર હોવાનું કહીને નમતું જોખવાની તૈયારી દેખાડી દીધી છે. ઉલ્લેખનીય છે કે, ભાજપ અને કોંગ્રેસ વિના કેન્દ્રમાં ત્રીજા મોરચાની સરકાર રચવાની ગઠજોડ પણ અત્યારથી શરૂ થઈ ગઈ છે ત્યારે કોંગ્રેસે પાણી પહેલા પાળ બાંધવાનો પ્રયાસ કરતાં ભાજપને સત્તાથી અળગો રાખવા વડાપ્રધાન પદનો આગ્રહ છોડવાની તૈયારી દેખાડીને ગઠબંધનની કવાયતને મજબૂત કરવાનો પ્રયાસ કર્યો છે. આટલું જ નહીં આમાં એવો સંકેત પણ મળી રહ્યો છે કે કોંગ્રેસ ચૂંટણી પરિણામોથી ખાસ આશાવાદી નથી. એટલે જ ભાજપને રોકવા માટે કોઈપણ ત્યાગ કરવાં તૈયાર થઈ રહ્યો છે.

આનાં ભાગરૂપે ગુલામનબી આઝાદે આજે કહ્યું હતું કે, કોંગ્રેસનો રૂખ સ્પષ્ટ છે. જો સહમતી બને તો પક્ષ નેતૃત્વનો સ્વીકાર કરશે. પરંતુ એક લક્ષ્ય હંમેશાથી નક્કી જ છે કે એનડીએ ફરીથી શાસનમાં પહોચવો જોઈએ નહીં. સર્વસંમતિથી લેવાતા કોઈપણ ફેંસલામાં કોંગ્રેસ સાથે રહેશે. જ્યાં સુધી વડાપ્રધાન પદનો પ્રસ્તાવ ન મળે ત્યાં સુધી કોંગ્રેસ કંઈ જ બોલવા માગતો નથી. જો કે કોઈપણ જવાબદારી સંભાળવા સામે પણ તેને કોઈ વાંધો નહીં હોય.

બીજીબાજુ પરિણામનાં દિવસે વિપક્ષી નેતાઓની બેઠક બોલાવીને સોનિયા ગાંધીએ અત્યારથી જ ગઠબંધનની કવાયત હાથ ધરી દીધી છે. યુપીએ મોરચાનાં સહયોગી પક્ષ ડીએમકે દ્વારા પણ પુષ્ટિ આપવામાં આવી હતી કે, પક્ષનાં પ્રમુખ એમ.કે.સ્ટાલીનને સોનિયા ગાંધીનું નિમંત્રણ મળ્યું છે.

સોનિયા ગાંધી આ વખતે ચૂંટણી પ્રચારમાં સક્રિય બન્યા નથી અને તેઓ ખાનગીમાં એનડીએ સીવાયનાં દળો સાથે સંપર્ક સાધતા રહ્યા હોવાનું કહેવામાં આવે છે. સોનિયા ગાંધીએ પક્ષનાં કમલનાથ સહિતના વરિષ્ઠ નેતાઓને બીજેડીનાં નવીન પટનાયક અને વાયએસ કોંગ્રેસનાં જગન મોહન રેડ્ડી ઉપરાંત ટીઆરએસનાં કે.સી. રાવને સાધવાની જવાબદારી સોંપી હતી. આ તમામ વચ્ચે અનૌપચારિક સંતલસ થઈ હોવાનું કહેવામાં આવે છે.