આણંદ ગુજરાતની એવી બેઠક જ્યાં 50 ટકા, 7.83 લાખ યુવા મતદારો છે

આણંદ લોકસભાની ચૂંટણી આ વખતે ખૂબ જ રસાકસીભરી બનશે. જેમાં યુવા મતદારોનું પ્રમાણ ઉત્તરોત્તર વધતા આણંદ જિલ્લામાં નોંધાયેલા કુલ 16,52,739 મતદારો પૈકીના 18 થી 40 વર્ષની વયના 8 લાખ જેટલા યુવા મતદારો છે. જેઓ આ વખતની લોકસભાની ચૂટણીમાં મહત્ત્વની ભૂમિકા ભજવશે. રાજકીય પક્ષો પણ યુવા મતદારોને પોતાની તરફ આકર્ષવા માટે આધુનિક ટૅકનોલૉજીનો ઉપયોગ કરવાનો પ્રયાસ કરી રહ્યા છે. પચાસ ટકા યુવા મતદારો આ વખતે નિર્ણાયક બનશે.

આણંદ જિલ્લામાં 16,52,739 મતદારો નોંધાયેલા છે. જેમાં 18 થી 19 વર્ષના 28,102 અને 20થી 29 વર્ષના 3,41,730 તેમજ 30થી 39 વર્ષના 4,13,831 સાથે કુલ 7,83,663 લાખ જેટલા યુવા મતદારો છે. જે કુલ મતદારો પૈકીના પચાસ ટકા જેટલાં થાય છે. જેમાંથી 18 થી 19 વર્ષની વય ધરાવતા 28,102 મતદારો પ્રથમવાર જ આ લોકસભાની ચૂંટણીમાં પોતાના મતનો ઉપયોગ કરશે. આ ઉપરાંત 40થી 49 વર્ષના 3,31,604, 50થી 59 વર્ષના 2,59,802, 60થી 69 વર્ષના 1,63,710, 70થી 79 વર્ષના 81,917 અને 80 વર્ષની વધુ ઉંમરના 26,643 મતદારો નોંધાયા હતા. જેઓ પણ આગામી લોકસભાની ચૂંટણીમાં પોતાના ભાવિ નેતાને ચૂંટવા માટે અગત્યની ભૂમિકા ભજવશે.

ખાસ કરીને યુવા મતદારોને આકર્ષવા માટે રાજકીય પક્ષોએ એડીચોટીનું જોર લગાવ્યું છે. આધુનિક ટૅકનોલૉજીનો ઉપયોગ કરતા યુવાઓને આકર્ષવા માટે ઇન્ટરનેટના માધ્યમથી, વોટ્સએપ, ફેસબુક, ઇન્સ્ટાગ્રામ, ટ્વીટર, ઇ-મેઇલનો ઉપયોગ કરવામાં આવી રહ્યો છે. વર્ષ 2009 અને 2014ની લોકસભા ચૂંટણીઓમાં પણ આ જ યુવા મતદારોએ મહત્ત્વની ભૂમિકા ભજવી હતી. આ 50 ટકા મતદારોમાં પણ 25 ટકા ઉપરાંત મહિલા મતદારોનો સમાવેશ થાય છે. જેમાં સૌથી વધુ શહેરી વિસ્તારના છે.