હવે આવી ગયો છે GST અવૉર્ડ

એક સમયે ટૅક્સચોરીમાં જબરદસ્ત વગોવાયેલી મોરબીની સિરૅમિક ઇન્ડસ્ટ્રી દ્વારા આ વખતે GSTની તરફેણમાં જે પગલું લેવામાં આવ્યું છે એ ખરેખર કાબિલે તારીફ છે. અત્યારે દેશભરના ઉદ્યોગપતિ અને વેપારીઓ જ્યારે GSTનો વિરોધ કરતાં આંદોલનો કરી રહ્યા છે ત્યારે મોરબી સિરૅમિક ફેડરેશન દ્વારા જાહેર કરવામાં આવ્યું છે કે જો કોઈ વેપારી GST વસૂલ્યા વિના અને બિલ વિના માલ વેચશે તો તેને અસોસિએશન દ્વારા પાંચ લાખ રૂપિયાનો દંડ કરવામાં આવશે. આ ફેડરેશનમાં મોરબીના ટાઇલ્સ અને સિરૅમિક્સ યુનિટની ૭૦૦ જેટલી ફૅક્ટરીઓનો સમાવેશ છે એ વિટ્રિફાઇડ ટાઇલ્સ અસોસિએશન, ફ્લોર ટાઇલ્સ અસોસિએશન અને વૉલ ટાઇલ્સ અસોસિએશન મળી ત્રણ અસોસિએશનનો સમાવેશ કરવામાં આવ્યો છે. વિટ્રિફાઇડ ટાઇલ્સ અસોસિએશનના પ્રમુખ કે. જી. કુંડારિયાએ કહ્યું હતું કે ‘આગેવાની કોઈકે લેવી પડશે અને એનો અમલ કરવા માટે આકરા પણ થવું પડશે. અત્યારે મોરબી દેશની ૮૦ ટકા ટાઇલ્સ અને સિરૅમિકની જરૂરિયાત પૂરી પાડે છે. અમે નથી ઇચ્છતા કે મોરબીના ઉદ્યોગનું નામ ખરાબ થાય એટલે અમે આ પગલું લીધું છે.’

દંડની જે જોગવાઈ કરવામાં આવી છે એમાં બે વખત દંડ લેવામાં આવશે, જ્યારે ત્રીજી વખત સમાન ભૂલ કરનારને અસોસિએશનમાંથી બહાર કાઢી મૂકવામાં આવે એવો નિર્ણય લેવામાં આવશે. ફૅક્ટરી પાસેથી લેવામાં આવેલી દંડની રકમમાંથી ૫૦ ટકા રકમ દેશ માટે શહીદ થયેલા જવાનોના પરિવારને આપવાનો નિર્ણય લીધો છે જ્યારે બાકીની ૫૦ ટકા રકમ ફૅક્ટરીના વર્કરોના ઉત્થાન માટે વાપરવામાં આવશે.

ચોરી પકડાવો, ઇનામ મેળવો

એક અઠવાડિયા પહેલાં ફેડરેશન દ્વારા દંડની જોગવાઈ કર્યા પછી ગઈ કાલે મોરબી સિરૅમિક ફેડરેશને મોરબીમાં રહેલા ટાઇલ્સ અને સિરૅમિકના ૫૦૦ જેટલા ટ્રેડર્સ સાથે મીટિંગ કરી હતી અને ટ્રેડર્સ સામે સ્કીમ મૂકી હતી કે જો બિલ વિનાનો કે GST ભર્યા વિનાનો માલ કોઈ ફૅક્ટરી વેચતી હોય તો એની જાણકારી આપનારાઓને પણ ઇનામ આપવામાં આવશે. આ ઇનામમાં વિટ્રિફાઇડ ટાઇલ્સના GST વિનાના માલની માહિતી મળશે તો માહિતી આપનારને ૨,૫૦,૦૦૧ રૂપિયાનું અને ફ્લોર કે વૉલ ટાઇલ્સના માલની માહિતી મળશે તો તેને ૧,૨૫,૦૦૧ રૂપિયાનું ઇનામ આપવામાં આવશે.