દિલ્હીની વર્કિંગ વુમન્સને જોઈએ છે વેપન લાઇસન્સ

રાજધાની નવી દિલ્હીમાં છેલ્લા કેટલાક સમયથી મોટી સંખ્યામાં વર્કિંગ વુમન્સે ગન-લાઇસન્સ માટે ઍપ્લિકેશન કરતાં પોલીસ ચોંકી ઊઠી છે. શહેરમાં રેપ, લૂંટ અને છેડતીની અનેક ઘટનાઓને પગલે મહિલાઓ સ્વરક્ષણ માટે હથિયારનું લાઇસન્સ મેળવવા માગે છે. છેલ્લાં બે વર્ષમાં દિલ્હી પોલીસને ગન-લાઇસન્સ માટે ૯૦૦થી વધુ મહિલાઓની અરજી મળી છે. ૨૦૧૦માં આવી કુલ ૩૨૦ ઍપ્લિકેશન મળી હતી, જ્યારે ૨૦૧૧માં ૫૦૦ અરજી મળી હતી. ટૂંકમાં અત્યારે હથિયારનું લાઇસન્સ મેળવવા માટે કરવામાં આવેલી અરજીઓમાં ૨૦-૨૨ ટકા અરજીઓ મહિલાઓએ કરી છે.

જોકે પોલીસના લાઇસન્સ વિભાગના એક અધિકારીએ કહ્યું હતું કે અનેક મહિલાઓ તેમના પિતા કે પતિનું લાઇસન્સ વારસામાં મેળવવા માગે છે અને આ જ કારણોસર લાઇસન્સ મેળવવા ઇચ્છતી મહિલાઓની સંખ્યામાં વધારો થયો છે. ૨૦૧૦માં પોલીસે ૧૭ મહિલાઓને લાઇસન્સ ઇશ્યુ કર્યા હતાં, જ્યારે ૨૦૧૧માં ૩૩ મહિલાઓને લાઇસન્સ ઇશ્યુ કરવામાં આવ્યાં હતાં. છેલ્લાં બે વર્ષમાં ૬૦૦થી વધુ અરજીઓ રિજેક્ટ કરવામાં આવી હતી.