ખિસ્સામાં મોબાઇલ ફાટ્યો : ભાંડુપની હોટલમાં જમતી વખતે બન્યો બનાવ

સ્માર્ટફોન માર્કેટમાં આવ્યા પછી અનેક વાર ગજવામાં કે હાથમાં મોબાઇલ બ્લાસ્ટ થવાના બનાવો બનતા રહ્યા છે. મુંબઇના ભાંડુપમાં બનેલો એક કિસ્સો મોબાઇલ ગજવામાં રાખીને ફરતા લોકો માટે લાલબત્તી સમાન છે.

ભાંડુપ (વેસ્ટ)ના સ્ટેશન રોડ પર આવેલી બગીચા હોટેલમાં 5મી જૂન 2018ની બપોરે પોણા બે વાગ્યે એક ગ્રાહકના ખીસ્સામાં મૂકેલા સૅમસંગ મોબાઇલમાં અચાનક બ્લાસ્ટ થયો હતો વિસ્ફોટને પગલે વ્યક્તિ  જમણા હાથમાં દાઝી ગયો હતો.

આ બનાવનો વિડિયો સોશ્યલ મીડિયા પર ગઈ કાલે વાઇરલ થયો હતો. ત્યાર બાદ આ બનાવની સંપૂર્ણ માહિતી આપતાં બગીચા હોટેલના મૅનેજરે પત્રકારોને જણાવ્યું હતું કે ‘આ બનાવ બન્યો ત્યારે ગ્રાહક તેના મિત્રો સાથે હોટેલમાં જમી રહ્યો હતો. અચાનક તેના શર્ટના ગજવામાં રાખેલા મોબાઇલમાં બ્લાસ્ટ થયો હતો. તેણે તરત જ તેના ગજવામાંથી મોબાઇલ ટેબલ પર ફેંકી દીધો હતો. મોબાઇલમાં બ્લાસ્ટ થતાં હોટેલમાં ધુમાડો ફેલાઈ ગયો હતો. તેની સાથે જમી રહેલા અન્ય કસ્ટમરો અને તેના મિત્રો ડરીને આઘાપાછા થઈ ગયા હતા. વાતાવરણ એકદમ તંગ થઈ ગયું હતું. જોકે આ બનાવમાં મોબાઇલ જેનો હતો તેના સિવાય કોઈને પણ ઈજા થઈ નહોતી. જેનો મોબાઇલ હતો એ વ્યક્તિ ગજવામાંથી સળગતો મોબાઇલ બહાર કાઢતાં જમણા હાથમાં દાઝી ગઈ હતી.’

આ બનાવ પછી હોટેલમાં થોડી વાર માટે ગભરાટ ફેલાયો હતો એમ જણાવતાં મૅનેજરે કહ્યું હતું કે ‘બનાવ બન્યા પછી અમે બધા જ ગભરાઈ ગયા હતા. એમાં અમે ગ્રાહકનું નામ પૂછવાનું પણ ભૂલી ગયા હતા. ગ્રાહક અને તેના મિત્રો પણ આ બનાવથી ડરીને હોટેલમાંથી તરત જ જતા રહ્યા હતા.’