World Update : દુનિયાના 40% કોરોનાના કેસ અમેરિકા-બ્રાઝીલમાં

કોરોના મહામારી વિશ્વના મોટાભાગના દેશોને શિકાર બનાવી ચૂકી છે, પરંતુ સૌથી વધુ પ્રભાવિત દેશોની શ્રેણીમાં પ્રથમ અમેરિકા અને બ્રાઝીલ છે. વિશ્વના કુલ કેસોના 40 ટકા કેસ આ બંને દેશોમાં છે. એટલુ જ નહીં, કોરોના સંક્રમણથી કુલ મૃત્યુદરનો 36 ટકા આ દેશમાં છે. જોકે વિતેલા 24 કલાકમાં અહીં નવા કેસ અને મૃત્યુઆંકમાં ઘટાડો નોંધાયો છે. અમેરિકામાં 41,448 અને બ્રાઝીલમાં 21,434 નવા કેસ સામે આવ્યા જ્યારે મૃત્યુઆંક ક્રમશ 509 અને 679 રહ્યો. 

હકીકત એ પણ છે કે વિતેલા કેટલાક દિવસથી વિશ્વમાં સૌથી વધારે નવા કેસ ભારતમાં સામે આવી રહ્યા છે, જે પછી અમેરિકા અને બ્રાઝીલમાં સામે આવી રહ્યા છે. વિશ્વ સ્તરે ભારત ત્રીજો સૌથી પ્રભાવિત દેશ બની ગયો છે. 

કોરોના સંક્રમણ પર નજર રાખી રહેલી વેબસાઇટ વર્લ્ડોમીટર મુજબ અમેરિકામાં કોરોના સંક્રમણના દર્દીઓનો આંકડો 25 ઓગષ્ટે 59 લાખથી વધુ પહોંચી ગયો હતો જેમાં 1.81 લાખથી વધુ દર્દીઓ જીવ ગુમાવી બેઠા છે. બ્રાઝીલમાં કુલ કેસોનો આંક વધીને 36 લાખ પહોંચી ગયો છે, અહીં 15 હજારથી વધુ લોકોના મોત થયા છે. રિકવરી રેટની વાત કરીએ તો અમેરિકામાં અત્યાર સુધી 32.17 લાખ કોરોના દર્દીઓ હવે સ્વસ્થ્ય બની ચૂક્યા છે. આ પ્રમાણ કુલ કેસોનો 54 ટકા ભાગ છે. અહી 25 લાખથી વધુ સક્રિય કેસ છે. બ્રાઝીલમાં રિકવરી રેટ 77 ટકા છે, અહીં 27 લાખથી વધુ લોકો સ્વસ્થ્ય બની ચૂક્યા છે.  

કોરોના મહામારીની શરુઆત ભયાનક હતી અને આજે પણ મોટાભાગના દેશો પ્રભાવિત છે, જોકે આ મુદ્દે દુનિયાના કેટલાક વિજ્ઞાનીઓ દાવો કરી રહ્યા છે કે વાયરસ ઝડપથી નબળો પડી રહ્યો છે અને શરુઆતમાં જેટલો ઘાતક હતો એટલો રહ્યો નથી.