SMC વિવાદી ડેપ્યુટી ટાઉન પ્લાનર અશ્વિન ટેલર 1.50 લાખની લાંચ લેતા ઝડપાયો

પાલિકાના ડેપ્યુટી ટાઉન પ્લાનર 1.50 લાખની લાંચ લેતા રંગહાથ ઝડપાયો હતો. લિંબાયત ઝોનના ડેપ્યુટી ટાઉન પ્લાનર અશ્વિન ટેલરે બાંધકામ ન તોડવા માટે 2 લાખની લાંચ માંગી હતી. 1.50 લાખમાં સેટલમેન્ટ કર્યું હતું. આ દોઢ લાખ રૂપિયા લેવા ઉધના દરવાજા ઉપર આવતા એસીબીના હાથે ઝડપાઈ ગયો હતો. અશ્વિન ટેલર સાથે વિવાદ હંમેશા જોડાયેલો રહ્યો હતો. ફેબ્રુઆરી 2017માં ડેપ્યુટી ટાઉન પ્લાનર અશ્વિન ટેલરને જમીનની ફાઈલ સાથે ચેડા કરીને કમિશનરને ઉઠા ભણાવવાના મામલે સસ્પેન્ડ કરવામાં આવ્યો હતો. 

લિંબાયત ઝોન વિસ્તારમાં આવતી કાપડ માર્કેટમાં મેન્ટેનન્સ મેનેજર તરીકે કામ કરતા વ્યક્તિ પાસે માર્કેટમાં થયેલા ગેરકાયદેસર બાંધકામ મુદ્દે લાંચ લેવાનો આ મામલો હતો. અશ્વિન ટેલરે પહેલા માર્કેટમાં ગેરકાયદેસર બાંધકામ માટેની નોટિસ આપી હતી. આ બાંધકામ દૂર કરવા માટે દબાણ કર્યું હતું. બાંધકામનું ડીમોલીશન નહીં કરવા માટે બે લાખ રૂપિયાની માગણી કરી હતી. છેવટે દોઢ લાખ રૂપિયા લેવાનું નક્કી કર્યું હતું. ફરિયાદીએ રૂપિયા નહીં આપવા હતા. એટલે એન્ટી કરપ્શન બ્યુરોનો સંપર્ક કર્યો હતો. એસીબીએ રવિવારે છટકું ગોઠવ્યું હતું. ઉધના દરવાજા પાસે અશ્વિન ટેલરને રૂપિયા લેવા માટે બોલાવ્યો હતો, જેવો રૂપિયા લેવા માટે આવ્યો અને રૂપિયા લીધા કે તરત જ એસીબીએ તેને દબોચી લીધો હતો.