BSE સેન્સેક્સમાં 495 પોઈન્ટ્સનો કડાકો

ક્રૂડના આંતરરાષ્ટ્રીય ભાવમાં થયેલી વૃદ્ધિએ ભારતીય શેરબજારની તેજી પર આજે બ્રેક મારી હતી. સાર્વત્રિક વેચવાલીથી સોમવારે BSE સેન્સેક્સ 495 પોઈન્ટ્સ ઘટીને બંધ રહ્યો હતો. ક્રૂડના ભાવ વધારાથી આયાત બિલ વધવાની આશંકાથી રૂપિયા પર પણ દબાણ જોવા મળ્યું હતું. ડોલર સામે રૂપિયો 0.75 ટકા ઘટીને 69.88 થયો હતો. ક્રૂડના ભાવ બેરલદીઠ 75થી 80 ડોલર સુધી વધવાની આશંકા સેવાઈ રહી છે.

આજે ઓઈલ-ગેસ, બેન્ક, રિયલ્ટી અને ઓટો શેરોમાં ધૂમ વેચવાલી જોવા મળી હતી. બેન્ક શેરોમાં આજે માર્ચ પછીનો સૌથી મોટો ઘટાડો જોવા મળ્યો હતો. બજાર હાલમાં ઊંચા મથાળે હોવાથી પણ તેમાં કરેક્શન જોવા મળ્યું હતું.

આજે દિવસ દરમિયાન BSE સેન્સેક્સ ઉપરમાં 39,158.22 અને નીચામાં 38,585.65 પોઈન્ટ્સની રેન્જમાં અથડાયા બાદ 495.10 પોઈન્ટ્સ (1.26 ટકા)ઘટીને 38,645.18 પોઈન્ટ્સની સપાટીએ બંધ રહ્યો હતો જ્યારે નિફ્ટી ઉપરમાં 11,727.05 અને નીચામાં 11,583.95 પોઈન્ટ્સ વચ્ચે ટ્રેડ થયા બાદ 158.35 પોઈન્ટ્સના કડાકા સાથે 11,594.45 પોઈન્ટ્સની સપાટીએ બંધ રહ્યો હતો.

BSE મિડકેપ અને BSE સ્મોલકેપ ઈન્ડેક્સ અનુક્રમે 1.53 ટકા અને 1.44 ટકા ઘટીને બંધ રહ્યા હતા.

અમેરિકાએ ઈરાનમાંથી ક્રૂડની આયાત બંધ થશે તેવી જાહેરાત કરતાં ક્રૂડના આંતરરાષ્ટ્રીય ભાવમાં 3 ટકાનો વધારો થયો હતો. ભારત અને ચીન ઈરાનના ક્રૂડના સૌથી મોટા ગ્રાહક છે અને તેથી તેમણે આ પ્રતિબંધો સામે વિરોધ કરીને લોબિઈંગ પણ કર્યું હતું. ક્રૂડના ભાવનો વધારો ભારતીય અર્થતંત્ર પર દબાણ સર્જી શકે છે.

આજે ઘટેલા મુખ્ય શેરોમાં યસ બેન્ક (6.62 ટકા), ઈન્ડસઈન્ડ બેન્ક (4.11 ટકા), રિલાયન્સ ઈન્ડ. (2.76 ટકા), ICICI બેન્ક (2.54 ટકા), HDFC (2.19 ટકા), હિરોમોટો કોર્પ (2.03 ટકા), એક્સિસ બેન્ક (1.91 ટકા), મારુતિ (1.82 ટકા)નો સમાવેશ થાય છે.