ચાર વર્ષની સઘન વાટાઘાટ પછી ફ્રી ઇન્ટરનેટનો માર્ગ મોકળો થયો

સરકાર નેટ ન્યુટ્રાલિટી અંગેના નિયમ સમાવવા ટૂંક સમયમાં ટેલિકોમ લાઇસન્સમાં ફેરફાર કરશે. તેમાં કન્ટેન્ટને બ્લોક કે ધીમું કરવા પર પ્રતિબંધનો સમાવેશ થાય છે. આ ઉપરાંત, મહત્ત્વની સેવાઓ માટે ફાસ્ટ લેન ફાળવાશે અને ‘કન્ટેન્ટ ડિલિવરી નેટવર્ક’ને કંપનીઓના અધિકારક્ષેત્રની બહાર મૂકવામાં આવશે. ટેલિકોમ કમિશન (TC)એ તા.11મી જુલાઇ 2018ના રોજ ટેલિકોમ નિયમનકર્તાની નવેમ્બર 2017ની ભલામણોને સંપૂર્ણપણે સ્વીકારી લીધી હતી. આ સાથે ઓપન ઇન્ટરનેટને ટેકો આપવાના ભારતના વલણને સમર્થન મળ્યું છે. નેટ ન્યુટ્રાલિટીના સમર્થકોએ આ પગલાને આવકાર્યું હતું. જોકે, ટેલિકોમ કંપનીઓના જણાવ્યા અનુસાર તેને લીધે ઇનોવેશન પર અસર થવાની શક્યતા છે.

ટેલિકોમ કમિશને નવી ટેલિકોમ પોલિસી ‘નેશનલ ડિજિટલ કમ્યુનિકેશન્સ પોલિસી 2018’ને મંજૂરી આપી હતી. પોલિસીનો લક્ષ્યાંક ભારતમાં ૨૦૨૨ સુધીમાં ૧૦૦ અબજ ડોલરથી વધુનું રોકાણ આકર્ષવાનો અને રોજગારી સર્જનનો છે. કેબિનેટને બે સપ્તાહમાં નવી પોલિસી રજૂ કરવામાં આવશે.

નેટ ન્યુટ્રાલિટી અંગે ટ્રાઇની તમામ ભલામણો સ્વીકારી લેવામાં આવી છે. કેટલીક મહત્ત્વની સર્વિસિસ સિવાય તમામ બાબતોમાં નેટ ન્યુટ્રાલિટીના મહત્ત્વના સિદ્ધાંતોને અનુસરવામાં આવશે.

DoT દ્વારા આ મહત્ત્વની સેવાઓને નોટિફાય કરવામાં આવશે. આ બાબત અન્ય દેશોની પદ્ધતિ મુજબની છે. ટ્રાઇ સાથેની ચર્ચા કરીને આગામી કેટલાક મહિનામાં મહત્ત્વની સર્વિસિસ અંગે નિર્ણય લેવાશે. જોકે, આ માળખું હાલ નવું અને સતત બદલાતું હોવાના કારણે સરકાર અક્કડ વલણ નહીં અપનાવી શકે.

પેનલ ટેલિકોમ કંપનીઓની સેવાની ગુણવત્તા નક્કી કરવા ટ્રાફિક મેનેજમેન્ટ પ્રેક્ટિસિસ (TMPs)નું માળખું નક્કી કરશે. ઉપરાંત નેટવર્કની સિક્યોરિટી, ઇમરજન્સી સર્વિસિસ, કોર્ટના આદેશનો અમલ અને સરકારના દિશાનિર્દેશ પારદર્શક હશે તો તેને પણ સમાવવામાં આવશે.

DoT ટેલિકોમ અને ઇન્ટરનેટ સર્વિસ પ્રોવાઇડર (ISP) લાઇસન્સમાં તાત્કાલિક ફેરફાર કરશે, જે ઓપન વેબના સિદ્ધાંતોને આધિન રહેશે. નિયમો માટે કેબિનેટની મંજૂરી જરૂરી નથી, પણ અમલ પહેલાં તેમને નોટિફાય કરવા પડશે.

ઉલ્લેખનીય છે કે, ચાર વર્ષની સઘન વાટાઘાટ પછી ફ્રી ઇન્ટરનેટનો માર્ગ મોકળો થયો છે.

નેટ ન્યુટ્રાલિટી અંગે મોબાઇલ ફોન ઓપરેટર્સ વિરુદ્ધ કન્ટેન્ટ પ્રોવાઇડર્સ અને એપ મેકર્સ વચ્ચે લાંબી ચર્ચા થઈ હતી. ટેલિકોમ કંપનીઓના જણાવ્યા અનુસાર તેઓ કોઈ પણ કેસમાં મતભેદ નહીં કરતા હોવાથી નિયમનની જરૂર નથી. જ્યારે એપ મેકર્સે કોઈ ભેદભાવ વગર સ્પષ્ટ નિયમોની માંગણી કરી હતી.