સુરતમાં સચિન SEZમાંથી સિન્થેટિક ડાયમંડની આડમાં રિયલ ડાયમંડની નિકાસનું કરોડોનું કૌભાંડ પકડાયું

સુરત ડીઆરઆઈની ટીમે સચિન સ્થિત સ્પેશિયલ ઇકોનોમિક ઝોનમાંથી ઓપરેટ થતાં સિન્થેટિક ડાયમંડની આડમાં રિયલ ડાયમંડ હોંગકોંગ સમેત અન્ય દેશોમાં નિકાસ કરવાના કરોડોની કિંમતના કૌભાડનું પગેરું દાબતા ઝીણવટભરી તપાસ હાથ ધરી છે. આ કૌભાંડમાં સુરતના હીરા ઉદ્યોગ સાથે સંકળાયેલા એકાદ બે મોટા માથાની સંડોવણી ખૂલે તો નવાઇ નહીં.

સચિનના સ્પેશિયલ ઈકોનોમિક ઝોન (સુરસેઝ)ની ડાયમંડ જવેલરી મેન્યુફેકરીંગ કરતી કંપની યુનિવર્સલ જેમ્સ પર કસ્ટમ અને ડીઆરઆઈએ દરોડા પાડીને કહેવાતી નિકાસ માટે તૈયાર કરાઇ રહેલા બે કન્ટેનરની તપાસ હાથ ધરી છે. આ તપાસમાં 3 વર્ષના એકસ્પોર્ટ  સહિતના વેપારના ડેટાની ચકાસણી હાથ ધરવામાં આવી છે.

આ કૌભાંડની મોડ્સ ઓપરેન્ડી એવી છે કે સિન્થેટિક ડાયમંડની આડમાં રિયલ ડાયમંડ ભેળવીને અન્ડર વેલ્યુશન તેમજ મીસડેકલેરેશન ઉપરાંત ડાયંમડની  સ્મગલીંગ કરવામાં આવ્યું હોવાનું જણાય આવે છે.

સુરતના  સચિન એસઈઝેડ વિસ્તારમાં આવેલા યુનિવર્સલ ડાયમંડ કંપની દ્વાર વિદેશમાં નિકાસ થઈ રહેલા ડાયમંડ બે કન્સાઈમેન્ટ પકડી પાડયા હતા. ડીઆરઆઈ અને કસ્ટમ દ્વારા તપાસમાં યુનિવર્સલ  ડાયમંડ પેઢીનાં સંચાલકો અંદાજે 50 હજાર કેરેટ રીયલ  ડાયમંડને લેબગ્રોન ડાયમંડ તરીકે ચોપડે દર્શાવ્યા છે.

જોકે કંપની દ્વારા તે પાર્સલને 27 હજાર કેરેટ બતાવી તેનું વોલ્યુમ પણ ઓછું દશાવવામાં આવ્યું હતું. તપાસમાં કન્સાઈમેન્ટમાં 4 કેરેટથી વધુના સિંગલ સિંગલ પીસ હીરા હોવાનું સામે આવ્યું છે.
હીરાની અંડર વેલ્યુ બતાવીને કન્સાઇમેન્ટ એકસપોર્ટ કરનાર કંપની યુનિવર્સલ જેમ્સ પર કસ્ટમ અને ડીઆરઆઈએ દરોડા પાડતા કંપનીનો  ડિરેકટર ફરાર થયો હતો. તેના ફરાર થતા અધિકારી વર્ગમાં એવી ચર્ચા છે. કે  23 વર્ષીય મીત કાછડીયા નામનો ડિરેકટર  ફકત પ્યાદુ હોવાનું માનવામાં આવી રહ્યું છે. જોકે આ કારભારમાં મોટા ખેલાડીઓ હોવાનું માનવામાં આવી રહ્યું છે. આવનારા દિવસમાં થનારી તપાસમાં મોટા નામો ખૂલે તેવી વકી છે.