૮૫ દેશમાં ડેલ્ટા પ્રકારના કોવિડ-૧૯ વાઇરસ ફેલાયા

વિશ્ર્વ આરોગ્ય સંસ્થાએ ૨૨મી જૂને બહાર પાડેલા આંકડા મુજબ ડેલ્ટા પ્રકારના કોરોનાવાઇરસ દુનિયાના ૮૫ દેશમાં ફેલાઇ ગયા છે.

તેણે જણાવ્યું હતું કે કોવિડ-૧૯નો આલ્ફા પ્રકાર ૧૭૦ દેશમાં, બીટા પ્રકાર ૧૧૯ દેશમાં, ગામા ૭૧ દેશમાં અને ડેલ્ટા ૮૫ દેશમાં ફેલાઇ ગયો છે.

વિશ્ર્વ આરોગ્ય સંસ્થાએ જણાવ્યું હતું કે દુનિયાના વધુ ૧૧ દેશમાં ડેલ્ટા પ્રકારનો કોવિડ-૧૯ જોવા મળતા આવા દેશોની સંખ્યા વધીને ૮૫ થઇ છે.

તેણે જણાવ્યું હતું કે કોવિડ-૧૯ના સૌથી વધુ નવા દરદીઓ ભારતમાં નોંધાયા હતા. આમ છતાં, ભારતમાં આવા દરદીઓની સંખ્યા ધીરે ધીરે ઘટી રહી હોવાનો દાવો કરાય છે.

અગ્નિ એશિયામાં તાજેતરમાં કોરોનાવાઇરસના નવા છ લાખ દરદી નોંધાયા હતા, જ્યારે વધુ અંદાજે ૧૯,૦૦૦ લોકો મૃત્યુ પામ્યા હતા. આ વિસ્તારમાં નવા દરદીઓની સંખ્યામાં ૨૧ ટકા અને મરણાંકમાં ૨૬ ટકાનો ઘટાડો થયો હતો.