કેરળમાં આજકાલમાં ચોમાસાનું આગમન: મુંબઇમાં 6 જૂને પધારશે મેઘરાજા

નૈર્ઋત્યના ચોમાસાનું કેરળના કાંઠે સોમવારે આગમન થઇ ગયું હોવાની માહિતી ખાનગી હવામાન સંસ્થા સ્કાયમેટ દ્વારા કરવામાં આવી હતી. બીજી તરફ હવામાનની આગાહી કરતી સરકારી સંસ્થા, ઈન્ડિયન મિટીરિઓલોજિકલ વિભાગ (આઇએમડી) દ્વારા તા.28મી મે એ સવારે ૮.૧૫ વાગ્યે બહાર પાડવામાં આવેલા બુલેટિનમાં જણાવાયું હતું કે આગામી ચોવીસ કલાકમાં કેરળમાં ચોમાસું શરૂ થશે.
આઈએમડીના એડિશનલ ડિરેક્ટર જનરલ મૃત્યુંજય મહાપાત્રાએ પણ આગામી ૨૪ કલાકમાં કેરળમાં ચોમાસું બેસી જવાની આગાહી કરી છે. મુંબઈમાં આ વખતે ચાર દિવસ જલદી એટલે કે છ જૂન સુધીમાં ચોમાસું દાખલ થઈ જશે એવી આગાહી ઈંડિયન મિટિયોરોલોજીકલ ડિપાર્ટમેન્ટે(આઈએમડી) કરી છે. આ દરમિયાન કેરળ-કર્ણાટકના કિનારા પર સર્જાયેલા હવાના ઓછા દબાણના પટ્ટાને કારણે મુંબઈમાં દિવસભર વાદળિયું વાતાવરણ રહ્યું હતું.

ભારતીય હવામાન ખાતાએ આપેલી માહિતી મુજબ મુંબઈ સહિત દેશમાં ચોમાસું દાખલ થવા માટે હવામાન અનુકૂળ છે. કેરળમાં ચોમાસું બેસી જતા ધીમી ગતિએ ચોમાસું દેશમાં આગળ વધશે. કોલાબા વેધશાળાના ડાયરેકટર બિશ્ર્વંભર સિંહના જણાવ્યા મુજબ આગામી ૨૪ કલાકમાં કેરળમાં ચોમાસું દાખલ થશે ત્યારબાદ આગામી બે-ત્રણ દિવસમાં કર્ણાટકમાં ચોમાસું પ્રવેશ કરીને કોંકણ માર્ગે મુંબઈમાં બેસી જશે. જોકે મુંબઈમાં આ વખતે ચાર દિવસ વહેલું એટલે કે છ જૂન સુધીમાં ચોમાસું બેસી જશે.

સ્કાયમેટે કેરળમાં ચોમાસું ૨૮મી મેએ શરૂ થવાની આગાહી કરી હતી, જ્યારે આઇએમડીએ તે ૨૯મી મેએ ચોમાસાના આગમનની આગાહી કરી હતી. આઇએમડીના જણાવ્યા પ્રમાણે ૧૦ મે પછી ૧૪ સ્ટેશન- મિનીકોય, એમિની, તિરુવનંતપુરમ, પુનાલુર, કોલ્લમ, અલ્લાપુઝા, કોટ્ટાયમ, કોચી, થ્રિસૂર, કોઝિકોડે, થલાસ્સેરી, કુન્નુર, કુડાલુ અને મેંગલૂરુ પૈકી ૬૦ ટકા સ્ટેશનોમાં ૨.૫ મિ.મી. અથવા તેથી વધુ વરસાદ સતત બે દિવસ સુધી પડે તો બીજા દિવસે કેરળમાં ચોમાસું બેસી ગયું હોવાની આગાહી કરવામાં આવે છે.

ચોમાસાના આગમનની આગાહી કરવાના નિર્ધારિત કરી શકાય એવા લક્ષણોમાં પશ્ર્ચિમી પવન કે વાયરો મુખ્ય દરિયાની સપાટીથી ૧૫,૦૦૦ ફૂટ ઊંચો ફૂૂકાતો હોવો જોઈએ. અને તે ૨૦૦ ડબ્લ્યુ-૨ કરતાં ઓછો હોવો જોઈએ. બધા સ્ટેશનો પર લોંગ વેવ રેડિયેશન ૧૪૦-૨ જેટલું નોંધવામાં આવ્યું હતું તે પવનના ક્રાઈટેરિયા સાથે મેચ થતું હોવાથી કહી શકાય કે કેરળમાં ચોમાસું આવી પહોંચ્યું છે, એમ સ્કાયમેટના ઉપાધ્યક્ષ મહેશ પાલવાતે જણાવ્યું હતું.