ભાટીયા ટોલ પર સ્થાનિક વાહનો માટે બે લેન

સાંસદ સી.આર. પાટીલે આપેલું અલ્ટીમેટમ પરીણામદાયી રહ્યું

નવસારીના સાંસદ સી.આર. પાટીલ તેમજ ધારાસભ્યો સર્વશ્રી હર્ષ સંઘવી, ઝંખનાબેન પટેલ, સંગીતાબેન પાટીલની સક્રિયતાને પગલે ભાટીયા ટોલ પ્લાઝાના નોકરીયાત સંચાલકોએ પોતાનું મમત્વ છોડવું પડ્યું હતું. સાંસદ સી.આર. પાટીલે તો ભાટીયા ટોલ પ્લાઝા પર સ્થાનિકો માટે બન્ને બાજુએ બબ્બે લેન શરૂ કરવા અંગે 24 કલાકનું અલ્ટીમેટમ આપ્યું હતું.

જ્યારથી ફાસ્ટેગનો અમલ શરૂ થયો છે ત્યારથી સૂરતને જોડતા ટોલ પ્લાઝા પર ટોલ પ્લાઝાના નોકરીયાત અધિકારીઓએ મનસ્વી રીતે સ્થાનિક વાહનચાલકોને હેરાન પરેશાન કરીને પૂરો ટોલ વસૂલ કરવાની પેંતરાબાજી શરૂ કરી હતી. સૂરત શહેર ઉપરાંત આસપાસના ગામડાઓના લોકો પણ રોજેરોજ ભાટીયા ટોલ પ્લાઝા ખાતેથી અવરજવર કરતા હોઇ, ફાસ્ટેગની આડમાં ભાટીયા ટોલ પ્લાઝાના સંચાલકોએ સ્થાનિક વાહનચાલકો માટે એક જ લેન રાખીને મોટી મોટી કતારો લાગે એવી ગોઠવણ કરી હતી. જેથી સ્થાનિકો કતારમાં ફસાવાની જગ્યાએ પૂરો ટોલ ભરીને ઝડપથી પાસ થઇ જવાનું મુનાસિબ સમજે એવી પેરવી કરી હતી.

જોકે, નવસારીના સાંસદ અને ગુજરાત ભાજપાના કદાવર નેતા સી.આર. પાટીલ તેમજ ધારાસભ્ય હર્ષ સંઘવી, સંગીતાબેન પાટીલ તેમજ અન્ય નેતાઓએ આ મુદ્દે કલેક્ટર, નેશનલ હાઇવે ઓથોરિટી તેમજ અન્ય સંબંધિત અધિકારીઓ સાથે બેઠક યોજીને સ્થાનિક વાહન ચાલકોને મળવાપાત્ર અધિકાર સત્વરે અપાવવાની માગ કરી હતી. તા.19મી ફેબ્રુઆરી 2020ના રોજ સી.આર. પાટીલે તંત્રવાહકોને અલ્ટીમેટમ આપ્યું હતું અને કહ્યું હતું કે રજૂઆતો, સમજાવટનો દૌર હવે બહુ થયો, આ મુદ્દે 24 કલાકમાં નિવેડો નહીં આવે તો મોટી લડત શરૂ કરવાના સંકેત આપ્યા હતા.

સી.આર. પાટીલે ભાટીયા ટોલ પર સૂરતના સ્થાનિકોને ફેસેલિટી મળે એ માટે દિલ્હી સુધી આક્રમક રજૂઆતો કરી હતી. અને તેનું પરીણામ આવ્યું છે. ભાટીય ટોલ પ્લાઝા ખાતે હવેથી સ્થાનિક વાહન ચાલકો ઝડપથી પસાર થઇ શકે તે માટે બન્ને તરફ બબ્બે લેન શરૂ કરવાની સૂચના આપી દેવામાં આવી છે અને તેનો અમલ ઝડપથી શરૂ કરી દેવાની ગતિવિધિ શરૂ કરી દેવામાં આવી છે.