પૃથ્વી શૉ ડોપ-ટેસ્ટમાં ફેઇલ: ૧૫મી નવેમ્બર સુધી સસ્પેન્ડ

ભારતનો ૧૯ વર્ષીય ટૅલન્ટેટ ટેસ્ટ-ઓપનર પૃથ્વી શૉ ડોપ-ટેસ્ટમાં ફેઇલ જતાં ક્રિકેટ બોર્ડે તેના રમવા પર આઠ મહિનાનો (૨૦૧૯ની ૧૬ માર્ચથી ૧૫ નવેમ્બર સુધીનો) પ્રતિબંધ મૂક્યો છે. તેના પરના પ્રતિબંધને સાડાચાર મહિના થઈ ગયા છે અને હવે ફક્ત સાડાત્રણ મહિના બાકી છે. જોકે, તે સાઉથ આફ્રિકા સામેની શ્રેણીમાં અને બંગલાદેશ સામેની પ્રથમ ટેસ્ટમાં નહીં રમી શકે.

પૃથ્વીએ ફેબ્રુઆરીમાં સૈયદ મુશ્તાક અલી ટ્રોફી ટી-ટ્વેન્ટી ટુર્નામેન્ટ દરમિયાન ક્રિકેટ બોર્ડના તપાસકારોને ડોપ-ટેસ્ટિંગ પ્રોગ્રામ હેઠળ યુરિન સૅમ્પલ આપ્યું હતું જેમાં ટર્બ્યુટલાઇન નામનું દ્રવ્ય હોવાનું રિપોર્ટમાં આવ્યું હતું. વિશ્ર્વસ્તરના સ્પોર્ટ્સ ક્ષેત્રે આ દ્રવ્ય પ્રતિબંધિત છે, પરંતુ એ કેટલાક કફ સિરપમાં વપરાય છે અને પૃથ્વીએ કફ થતાં અજાણતાં ટર્બ્યુટલાઇનના સમાવેશવાળું સિરપ પીધું હતું. તે ઈજાની સારવાર પણ લઈ રહ્યો હતો.

૧૯ વર્ષીય ઓપનરે અજાણતાં પ્રતિબંધિત ટર્બ્યુટલાઇન લીધું હતું

પૃથ્વીએ ક્રિકેટ બોર્ડને ખુલાસામાં કહ્યું હતું કે તેણે પર્ફોર્મન્સ સુધારવાના હેતુથી નહીં, પણ કફમાંથી મુક્તિ મેળવવા આ સિરપ પીધું હતું. પૃથ્વીએ આ ‘લાપરવાહી’ કબૂલી લીધી હોવાના અભિગમને બોર્ડે આવકાર્યો છે. જોકે, નિયમ મુજબ તેના પર પ્રતિબંધ મૂકવામાં આવ્યો છે. પૃથ્વીની સાથે બીજા બે ડોમેસ્ટિક પ્લેયરો અક્ષય દુલારવર (વિદર્ભ) તથા દિવ્ય ગજરાજ (રાજસ્થાન)થી પણ ડોપિંગને લગતા નિયમોનો ભંગ થયો છે.