ભારે વરસાદથી જોખમી બની દેશની નદીઓ

દેશભરમાં વરસાદના કારણે જનજીવન અસ્તવ્યસ્ત છે. નદીઓના જળસ્તરમાં સતત થઈ રહેલા વધારના કારણે ઘણા વિસ્તારોમાં પુરનું સંકટ ઉભું થયું છે. પૂર્વોત્તરના રાજ્ય આસામમાં સતત વરસાદના કારણે બ્રહ્મપુત્ર નદી જોખમી નિશાનથી ઉપર વહી રહી છે. પુરનું પાણી રાજ્યના ઘણા મંદિરોમાં ઘૂસી ચૂક્યું છે.

ઉપરાંત મહારાષ્ટ્ર, ઉત્તર પ્રદેશમાં પણ ભારે વરસાદના કારણે નદીઓએ રૌદ્ર સ્વરૂપ ધારણ કર્યું છે. મેઘાયલમાં પણ પુરની સ્થિતિ ઉભી થવાની ભીતિ છે. આસામ સહિતના રાજ્યોમાં સંકટ વચ્ચે હવામાન વિભાગે કહ્યું છે કે આગામી બે અઠવાડિયામાં સરેરાશથી ઓછો વરસાદ થશે. આ આગાહીના કારણે લોકોએ રાહતનો શ્વાસ ખેંચ્યો છે.

મેઘાલય, આસામ, મહારાષ્ટ્ર અને ઉત્તર પ્રદેશમાં હજી પણ જોખમ છે. કેન્દ્ર જળ આયોગના રિપોર્ટ પ્રમાણે કાનપુર, ડલમઉ, ફાફામઉ, પ્રયાગરાજ,’ મિર્ઝાપુર, વારાણસી, ગાઝીપુર, અને બલિયામાં ગંગાનું જળસ્તર જ્યારે કાલાગઢ, મુરાદાબાદ, અને બરેલીમાં રામગંગાનું જળસ્તર સતત વધી રહ્યું છે. આવી જ રીતે ગોમતીમાં પણ સતત પાણીની આવક થઈ રહી છે. મહારાષ્ટ્રમાં પણં વરસાદના કારણે સંકટમાં વધારો થયો છે.