આજે (10/01/2020)વર્ષનું પહેલું ચંદ્રગ્રહણ

૨૦૨૦ની પ્રથમ ખગોળીય અવકાશી ઘટના ૧૦મી જાન્યુઆરીના રોજ થવા જઇ રહી છે. ૧૦મી જાન્યુઆરીના રોજ ચંદ્રગ્રહણ છે જે પ. બંગાળ સહિત ભારતના દરેક ભાગમાં દેખાશે.

ચંદ્રગ્રહણ ભારતીય સમય મુજબ રાજે ૧૦.૩૭ કલાકે શરૂ થશે અને ૧૧ જાન્યુઆરીના રોજ વહેલી સવારે ૨.૪૨ કલાકે પૂરું થશે, એવી અત્રેના બિરલા પ્લેનેટોરિયમના ડિરેક્ટર એમ. પી. બિરલાએ માહિતી આપી હતી. આ વર્ષે ચાર ચંદ્રગ્રહણ થવાના છે, જેમાંનું પહેલું ચંદ્રગ્રહણ ૧૦ જાન્યુઆરીના રોજ છે. અન્ય ચંદ્રગ્રહણ ૫ જૂન, ૫ જુલાઇ અને ૩૦ નવેમ્બરના રોજ થશે. આ ચંદ્રગ્રહણ

એશિયા, આફ્રિકા, ઑસ્ટ્રેલિયા અને યુરોપના ઘણા દેશમાં દેખાશે.

ચંદ્રગ્રહણ એક ખગોળીય સ્થિતિ છે. જ્યારે સૂર્ય, ચંદ્ર અને પૃથ્વી એક સીધી રેખામાં આવે ત્યારે ગ્રહણ થાય છે. ચંદ્રગ્રહણ સમયે સૂર્ય અને ચંદ્રની વચ્ચે પૃથ્વી આવી જવાથી પૃથ્વીનો પડછાયો ચંદ્ર પર પડે છે અને ચંદ્રનો એટલો ભાગ દેખાતો નથી. આપણી પૃથ્વી સૂર્યની આસપાસ પ્રદક્ષિણા કરે છે અને ચંદ્ર પૃથ્વીની આસપાસ પ્રદક્ષિણા કરે છે. પૃથ્વી અને ચંદ્ર એક સાથે રહીને સૂર્યની પ્રદક્ષિણા કરે છે. સૂર્યનો પ્રકાશ પૃથ્વી અને ચંદ્ર પર પડે છે. ચંદ્ર આપણને સૂર્યપ્રકાશના પરાવર્તનથી દેખાય છે. ચંદ્રગ્રહણ માત્ર પૂનમના દિવસે જ થાય છે.