ખટોદરા પોલીસ મથકમાં ચોરીના શકમંદ આરોપી ઓમપ્રકાશ પાંડેને બેફામ માર મારીને મૃત્યુ નિપજાવવાના બનાવમાં ફોજદાર ચૌધરી અને પોલીસમેન હરેશની ધરપકડ કરવામાં આવી હતી.

પંદર દિવસ પહેલા તા. 29મીએ ઘરફોડ ચોરીના ગુનામાં ઓમપ્રકાશ પાંડે, જયપ્રકાશ અને રામગોપાલની અટકાયત કરીને ખટોદરા પોલીસ મથકમાં લાવવામાં આવ્યા હતાં. ત્યાં ગુનાની કબુલાત કરાવવા માટે ત્રણેયને બેફામ માર મારવામાં આવ્યો હતો. ઓમપ્રકાશ પાંડેને ઉંધો લટકાવીને માર મરાયો હતો. તેના કારણે તેની તબિયત લથડી  હતી અને તેને સારવાર માટે હોસ્પિટલમાં લઇ જવાયો હતો. જયાં તેનું મૃત્યુ નિપજ્યું હતું. આ કસ્ટોડિયલ ડેથના બનાવ અંગે ખટોદરા પોલીસ સ્ટેશનના પીઆઇ ખીલેરી, પીએસઆઇ ચૌધરી સહિત આઠ સામે ગુનો નોંધાયો હતો. આ બનાવમાં  સંડોવાયેલ ફોજદાર ચૌધરી અને પોલીસમેન હરેશ આજે સુરત ક્રાઇમ બ્રાંચ સમક્ષ હાજર થયા હતાં. એ બન્નેની ધરપકડ કરીને તપાસનીશ અધિકારીએ પુછપરછ હાથ ધરી હતી. આ બનાવમાં તાજના સાક્ષીની આકરી પુછપરછ કરીને ધરપકડ કરાઇ હતી. બાદમાં તેને રિમાન્ડ પર મેળવવામાં આવ્યો હતો. રિમાન્ડ મુદ્દત પુરી થતાં જેલ હવાલે કરાયો હતો. પોલીસ મથકમાં સાક્ષીને પણ માર મરાયો હતો.